VOLLEYBALL: UTB yihariye ibikombe by’irushanwa ry’Intwari 2019-

Ku mugoroba w’iki Cyumweru dusoje ni bwo mu ishyirahamwe ry’umukino wa Volleyball hasozwaga imikino y’irushanwa ryo kwibuka Intwari z’u Rwanda, UTB VC yatwaye ibikombe bibiri haba mu bagore n’abagabo kuko zitwaye neza ku mikino ya nyuma.

kipe ya UTB VC mu cyiciro cy’abagabo yatwaye igikombe itsinze Gisagara VC amaseti 3-1 ku mukino wa nyuma utari woroshye kuko aya makipe yombi asanzwe ari ibigugu bibiri bihora bihanganye.

Ni UTB VC muri iyi minsi isa na ya mbogo yari yaraburiwe uwuzayihangara, ni UTB VC iri mu murongo mwiza wo gutwara igikombe cya shampiyona, ni UTB VC iheruka gutsinda Gisagara VC muri shampiyona mu mukino wabereye mu Karere ka Gisagara bagakizwa na seti ya kamara mpaka.

UTB VC imanika igikombe yatwaye itsinze Gisagara VC

UTB VC yo kuri iki Cyumweru yaje yakaniye ishaka igikombe nyuma yo kuba mu mikino y’ijonjora yari yabanje kwivuna REG VC.

Seti ya mbere yatwawe na UTB VC itsinze amanota 25 mu gihe Gisagara yari ikiri ku manota 17. Seti ya kabiri yaje kongera kuba iya UTB VC itsinze amanota 26-24 mbere yuko Gisagara VC itsinda seti ya gatatu n’amanota 25-17

Byari kuba ishiraniro kurushaho iyo Gisagara VC yongera igatsida seti ikurikiye kuko bari guhita bakina seti ya kamarampaka yo gutanguranwa amanota 15, gusa ntabwo byakundiye iyi Gisagara VC kuko UTB VC yahise iyihebya iyitsinda amanota 25-19 mu iseti ya kane.

Mu cyiciro cy’abagore, UTB WVC yongeye gutwara igikombe itsinze RRA WVC amaseti 3-1 ku mukino wa nyuma wabanjirije basaza babo.

Seti ya mbere yatwawe na RRA itsinze amanota 25-23 mbere yuko UTB VC ikanguka igahita ibishyura n’amanota 25-17. Seti ya gatatu yongeye gutwarwa na UTB itsinze amanota 25-18 ihita inatsinda iya kane n’amanota 25-13. UTB VC ni nayo iheruka gutwara igikombe cy’irushanwa ribanziriza shampiyona y’abali n’abategarugoli, irushanwa n’ubundi ryari ryateguwe na kaminuza ya UTB VC ibarizwa ku Kicukiro.

Mu cyiciro cy’amakipe asanzwe ahatana mu cyiciro cya kabiri (Serie B), Don Bosco Gatenga yatwaye igikombe itsinze Christ Roi amaseti 3-2 (25-21,35-37, 17-25, 25-17 na 15-12).

Ibihembo byatanzwe mu irushanwa ry’Intwari 2019 ryatewe inkunga na CHENO:

Serie B-Abagabo

1. DON BOSCO GATENGA (Serie B): 200,000 FRW n’igikombe

2. Christ Roi: 150,000 RWF

3. Petit Seminaire Virgo Fidelis: 100,000 RWF

Mu cyiciro cy’abagore:

1. UTB WVC: 300, 000 FRW n’Igikombe.

2. RRA WVC: 200,000 RWF

3. APR WVC: 100,000 RWF

Serie A – Abagabo

1. UTB VC: 300,000 FRW n’igikombe.

2. Gisagara VC: 200,000 FRW

3. APR VC: 100,000 FRW

Leave a Reply

Your email address will not be published. Required fields are marked *