U Rwanda rwatakaje imyanya itatu ku rutonde ngarukakwezi rwa FIFA

Ikipe y’igihugu y’u Rwanda ‘Amavubi’ yasubiye inyuma imyanya itatu ku rutonde ngarukakwezi rukorwa n’Ishyirahamwe ry’Umupira w’amaguru ku Isi, FIFA, igera ku wa 138.

Ku rutonde rwasohotse kuri uyu wa Kane, bigaragara ko mu gihe imikino 150 mpuzamahanga yabaye ku migabane yose mu kwezi gushize, nta mpinduka zikomeye yasize ku rutonde rwa FIFA, urebye nko mu makipe atatu ya mbere.

Ikipe y’u Rwanda iheruka kunyagirwa n’iya Côte d’Ivoire mu gushaka itike ya CAN 2019 ibitego 3-0, yasubiye inyuma imyanya itatu igera ku wa 138 ndetse itakaza amanota atandatu, igira 1088.

Ikipe y’u Burundi iherutse kubona itike yo kujya mu gikombe cya Afurika ku nshuro ya mbere yo yazamutse imyanya ibiri igera ku mwanya wa 136, mu gihe Tanzania yazamutseho imyanya itandatu iba iya 131.

Uganda yatsinzwe na Tanzania mu mukino watumye ibi byombi bizajyana mu gikombe cya Afurika, yo yatakaje imyanya ibiri igera ku wa 79.

Muri rusange nta kipe yavuye mu 10 ya mbere ku Isi. Israel ni cyo gihugu cyazamutse mu manota cyane (20) inazamuka mu myanya kurusha abandi (8) iba iya 84 mu gihe Autriche yatakaje amanota menshi kurusha abandi (30) ndetse isubira inyuma imyanya (11), iba iya 34.

Uganda niyo iza mbere mu karere ka Afurika y’Uburasirazuba aho iri ku mwanya wa 79 ku Isi na 16 muri Afurika, Kenya 108 ku Isi na 25 muri Afurika, Tanzania 131 na 36 muri Afurika, u Burundi bwa 132 ku Isi na 37 muri Afurika, u Rwanda rwa 138 na 38 muri Afurika na Sudani y’Epfo ya 167 ku Isi na 48 muri Afurika.

Ibihugu 10 bya mbere muri Afurika: Sénégal ya 23 ku Isi, Tunisia ya 28, Nigeria ya 42, Morocco ya 45, DR Congo ya 46, Ghana ya 49, Cameroun ya 54, Misiri ya 57, Burkina Faso ya 58 na Mali ya 65 inganya amanota na Côte d’Ivoire.

Ibihugu 10 bya mbere ku Isi: u Bubiligi, u Bufaransa, Brésil, u Bwongereza, Croatia, Uruguay, Portugal, u Busuwisi, Espagne na Denmark.

Ku rutonde ngarukakwezi rwashyizwe ahagaragara mu bagore mu cyumweru gishize, u Rwanda naho rwatakaje imyanya itatu ruza ku mwanya wa 140.

Leave a Reply

Your email address will not be published. Required fields are marked *