Ole Gunnar Solskjaer yemejwe nk’umutoza mukuru wa Manchester United

Umunya-Norvège w’imyaka 46; Ole Gunnar Solskjaer wari umaze iminsi atoza Manchester United by’agateganyo, yahawe amasezerano y’imyaka itatu nk’umutoza mukuru uhoraho.

Mu gitondo cyo kuri uyu wa Kane nibwo ubuyobozi bwa Manchester United yo mu cyiciro cya mbere mu Bwongereza bwashyize hanze itangazo rivuga ko bwamaze kwemeza Ole Gunnar Solskjaer nk’umutoza mukuru w’iyi kipe mu gihe cy’imyaka itatu iri imbere, aho azajya ahabwa miliyoni zirindwi z’amapawundi.

Ole Gunnar Solskjaer yatozaga Manchester United yakiniye, guhera tariki ya 19 Ukuboza umwaka ushize nyuma yo gusimbura José Mourinho wari umaze kwirukana n’iyi kipe ifite ibigwi mu Bwongereza no ku mugabane w’Uburayi.

Nyuma yo kwemezwa nk’umutoza mukuru, Ole Gunnar Solskjaer yavuze ko zari inzozi ze kuba umutoza ndetse bikaba akarusho muri Manchester United yagiriyemo ibihe byiza ari umukinnyi akegukana UEFA Champions League mu 1999.

Ati « Ni iby’agaciro mu kuri. Ndatekereza buri wese abizi, nabivuzeho mu mezi make ashize, ni akazi nahoze ndota kuzakora muri buri kipe, by’umwihariko muri Manchester United. Kuba mpahwe umwanya wo kugira aho ngeza ikipe, ni ibintu byiza cyane.”

Abajijwe uburyo yiyumvaga muri iyi minsi ishize aho yashimwaga cyane n’abafana b’iyi kipe bavuga ko yayizamuriye urwego ikongera ikagaruka mu bihe byo gutsinda, Solskjaer yavuze ko ashimira abafana uburyo bakomeje kumushyigikira we n’abo bafatanyije.

Ati «Narabyakiraga ariko navuga ko amezi make ashize twagize ibihe byiza bidasanzwe, uburyo abafana bitwaye ku bakinnyi, kuri njye n’abo dukorana mu gutoza. Turabashimira ko badushyigikira kandi natwe turabizeza kubibishyura.”

Ole Gunnar Solskjaer yakiniye Manchester United hagati y’umwaka wa 1996 na 2007, ayitsindira ibitego 126 mu mikino 366 mbere yo kuba umutoza w’ikipe yayo ya kabiri kugeza mu 2011.

Ubwo Mourinho yari amaze kwirukanwa, uyu mugabo wari uvuye muri Molde y’iwabo atijwe, yatangiye akazi ke atsinda Cardiff City ibitego 5-1 mu mukino wa shampiyona. Kuri ubu, Ole Gunnar Solskjaer amaze gutoza imikino 19, atsindamo 14, atsindwa itatu mu gihe yanganyije imikino ibiri.

Muri iyi mikino, Manchester United yinjijemo ibitego 40, yinjizwa ibitego 17 mu gihe imikino irindwi ariyo yarangiye batinjijwe igitego mu izamu.

Kugarura Manchester United mu ruhando rwo guhatanira imyanya ine ya mbere muri shampiyona no kuyigeza muri ¼ cya UEFA Champions League ikuyemo Paris Saint-Germain biri mu byatumye uyu mutoza agirirwa icyizere n’ubuyobozi.

Manchester United iri ku mwanya wa gatanu n’amanota 58, aho irushwa amanota abiri na Arsenal ya kane muri Premier League isigaje imikino umunani gusa. Muri ¼ cya Champions League, Manchester United izahura na FC Barcelone mu kwezi gutaha.

Leave a Reply

Your email address will not be published. Required fields are marked *